Educational Tips and Guidelines (version 2)

أنا ليه مش من الناس المتفوقه !!؟؟

هما الناس المتفوقه عندهم إيه أكتر من الناس اللي مش متفوقه !!؟؟

أكيد عندهم مخ زياده ….. صح …. هي دي …. أكيد عندهم مخ زياده, لأ لأ ولا مخ زياده ولا بتاع ….

أكيد عندهم Time Machine بتزود الوقت مثلا فبيزاكرو براحتهم واحنا مش لاقيين وقت

لأ لأ بردو …

أمال إيييييه !!؟

بعد تفكير طويل… تأكدت إن الناس المتفوقين هما عندهم بالفطره إمكانيات للتفوق

بس يا ترى كام % يعني مؤهلات فطريه ؟؟

اللي انا بردو تأكدت منه إن النسبه دي قليلة جدا والفكره كلها إنهم بيتطوروا من نفسهم وبيحاولو دايما يبقو أفضل وأفضل ودايما بيحاولوا يعرفوا هما عملو إيه غلط ويتعلموا من أخطائهم

في محاولة للتغيير الجذري … حاولت أجمع النقط اللي أنا استفدتها والأخطاء المتكررة مني ومن بعض الناس اللي بشوفها خلال الست ترمات اللي فاتو عشان الترم الجي إن شاء الله يبقى أفضل وأفضل لينا كلنا

أنا قسمت النقط لتلات محاور أساسيه: في الكلية و المذاكرة و أثناء الإمتحانات

في الكلية:

• لازم تكون عندك نيهلكل حاجه بتعملها يعني مثلا انا هتعلم واجتهد علشان ارضي ربنا ووالدي ووالدتي وارفع رأس الدين واشارك في نهضة البلد و و و … ولازم دايما تحسن الظن بالله ودي حاجه مهمه جدااا
  _____
  
• عشان تبقى من المتفوقين ,خلي عندك دافع قوي و ده تقدر تجيبو عن طريق انك ترتب اولوياتك وتشوف هل العلم موجود في اولوياتك دي ولا لأوبعدين تعمل خطة عشان تبقي من الناس المتفوقين. خلي عندك هدف وتحددله مدة معينة في السنة مثلا وخليك متابع الهدف ده شهر بشهر و اسبوع بإسبوع وكل يوم كده في بدايته, قول انا  ناوي أخلص من الهدف إيه._
  _____
  
• دور على حد من اصحابكيكون ليه نفس هدفك و عنده نفس حماسك و شجعو بعض, دي حاجة مهمة جدا._
  _____ 
• إحضر كل المحاضرات والسكاشن حتى لو الدكتور مش كويس أو “فكسان” لمجرد إنك تبقى فاهم بس هو بيقول إيه, وإيه الحاجات اللي بيركز عليها, وإيه ال assignments وال tasks اللي هو عايزها._
  _____ 
• ال assignments وال attending وال project والعملي, أربع حاجات إحنا بنتعامل معاهم عادي في حين إن دول كلهم عوامل مؤثره جدا في تقدير الماده العام. _
  _ 
• ساعد الناس وحاول تفيدهم, عشان ربنا يكرمك ويباركلك في علمك. حاول تستخدم CISClub عشان تساعد الناس وتكون متابع بردو وعارف آخر الأخبار :D, اشرح لنفسك و لغيرك برضه, ده هيثبت المعلومة وتاخد ثواب في نفس الوقت.
  _
• إكتببإيدك في المحاضرات والسكاشن واكتب notes بإيدك بالعربي أو English أو Franco كله هينفع إن شاء الله, المهم لما تيجي تبص تاني في الكلام اللي انتا كاتبه متقولش “هو الدكتو كان قاصده إيه هنا ؟!!”.
  _ 
• إوعى تتكسف تسأل في المحاضره أو السكشن وتقول “مش فاهم” وتأكد إن الحاجه اللي انتا مش فاهمها بيبقى في ناس كتير مش فاهمينها بس مكسوفين بردو يقولو مش فاهمين.
  _ 
• اسأل الناس اللي أكبر منك عن الترم اللي انت داخله … شكله هيبقى عامل إزاي؟ عشان لما تيجي تحط خطة تبقى خطة تتسم بالوضوح.
  _ 
• متضيعش وقتك في الجنينة, دايما اشغل نفسك بتطوير نفسك, الجنينة دي خليها تفاريح كده.

المذاكرة:

• ذاكر من أول السنه حتى لو نص ساعه بس في اليوم. فعلا هتفرق كتير جداا يوم ما تيجي تراجع قبل ال Midterm أو ال Final هتبقى مجرد بتراجع, مش محتاج تفهم حاجه من الأول. نظم وقتك بشكل عام بين مذاكرة المواد و بعضها… ده شيء مهم جدا و حط في اعتبارك ان لازم يكون فيه وقت لنفسك و لحياتك اكيد الدنيا كلها مش مذاكرة و بس و في نفس الوقت مش كل الوقت “فيس بوك” و “مسنجر”.
  _ 
• واحد من المعيدين قالي “أنا كنت دايما بقفل ال Final بس مبجبش دراجات كويسه واكتشفت بعد سنتين إن ده بسبب إن أنا بدخل ال midterm عادي, زي الناس يعني, فبقيت بركز جدا قبل ال midterms وبقيت فعلا بجيب إمتيازات”.
  _ 
• Get out of the box متوقفش العلم على اللي موجود في المحاضرات والسكاشن, الأجزاء اللي تعجبك روح search عليها هتفرق معاك جدا وحتي لو لقيت كلام مش فاهم منه حاجة برضه هيفرق معاك يعني.
  _ 
• اسرح كتير, مش سرحان فراغ, لأ, انا اقصد Think Mooooore يعني مثلا فكر هما إزاي وصلوا لل “الجورزم” ده او “التكنيك” ده, حاول تطلع ال bugs اللي فيه هو غالبا هتتطلع انت اللي غلط في الآخر بس  هتستفيد كتير أوي من المناقشات اللي بتحصل وغالبا انت بيكون عندك لبس مثلا بين اتنين concepts دخلوا على بعض, فبتطلع فاهم اوي و بتظبط اللخبطه اللي عندك و بعد كده لما تقابل مشكلة شبه كده في حياتك او في ال programming تقدر تحلها بسهولة ,, الحقيقة الموضوع ده فيه عيب انه بيضيع وقت كبيير عشان كده انا قولت مش كتير بس بجد لما تتعود تفكر في المشكلة أحسن بكتير لما تلاقي حل المشكة.
  _ 
• حاول تخلي عندك نظام في النوم, خط أحمر متنمش بعده إلا في الطوارىء, عشان تعرف تصحى بدري وتحضر المحاضرات من أولها. وحاول تنام على الأقل 5 أو 6 ساعات. كل الناس المحترمه اللي أعرفها قالولي “يا حبيبي ذاكر الصبح, بعد الفجر” – بس أنا مخي بقى حاجه برباط واسمها جزمه- دايما لما آجي أذاكر, بذاكر بليل وانام بعد الفجر.
  _ 
• غالبا كل تيرم بتبقى فيه ماده عايزه حفظ كتير, الحل في المواد دي حاجتين
• ____إن الماده دي لااازم تبدأ تحفظ فيها من أول السنه, ولااازم تتفهم حتى لو هي بتتدرس بطريقه غلط – للأسف زي ال IS والBusiness - عشان الحفظ بدون فهم حاجه شبه مستحيله.
• ____إنك تجيب امتحانات السنين اللي فاتت وتضربهم في خلاط وتعد تشرب
  _
• العوامل النفسية اللي بتاثر على البني ادم اللي بيذاكر حاجة مهمة جداااا, يعني حاول كده تعلي معنوياتك و بلاش حرقة الاعصاب مفيش حاجة تستاهل. يارااااااجل … كبر مخك
  _ 
• خلي بالك إن كل مادة ليها طريقة مذاكرة مختلفة تماما عن غيرها, ده بقى على حسب إزاي الدكتور بيسأل في الإمتحان. شطارتك إنك تعرف الطريقة ديه بدري عشان تذاكر بيها و طبعا دي الطريقة اللي تجاوب بيها في الامتحان وعشان تعرف الطريقة دي اسأل الدكتور أسئلة مختلفة واعرف هو بيجاوب إزاي. لما تيجي تسأل الدكتور عن حاجة اسئله بإسلوب كويس واحترمه فعلا, يعني متتعصبش عليه ولا تتخانق معاه, بلاش بلطجة, ده هيفرق أوي, أقل حاجة هيجاوبك بضمير ولما تجي تسأله تاني هيسمعك من غير ميكون مخنوق منك
  _ 
• ممكن انت واصحابك تقسموا لمواد مابنينكم وكل واحد شاطر في ماده اوي يشرحها للباقيين, وبكده انت بتقلل من المجهود اللي هتبذله مع كل ماده ف البيت.
  _ 
• آخر حاجه, تأكد إن كل دي مجرد أسباب وإن ربنا وحده هو اللي هيوفقك إن شاء الله. ولازم تحط في دماغك بردو إن ربنا بيدي كل واحد على قد تعبه إسأل نفسك, “هو انا تعبت؟”, “هو انا عملت اللي عليا؟”, “هو انا فعلا أستحق توفيق ربنا؟؟”.

أثناء الإمتحانات:

• حط في دماغك إن اللي بيصحح بنى آدم زيي وزيك
• ____مش لازم تشخبط كتير. إستخدم ال Corrector بدون مبالغه في استخدامه.
• ____حاول تكتب بخط نضيف وواضح.
• ____سطر الورقه لو عندك وقت.
  _ 
• نام كويس قبل الإمتحان (عمري ما عملتها تقريبا :D)
  _ 
• لو فيه سؤال محتاج أرقام وخطوات وكده ومفيش وقت خالص, ممكن تكتب بالعربي أو ال English هعمل كذا وبعدين كذا و… على الأقل هتاخد جزء من الدرجه. أكيد أحسن من مفيش خالص.
  _
• خد بالك من الوقت وخد معاك ساعه حطها قدامك أو إسأل المراقب كل شويه, هشان في بعض الإمتحانات الوقت بيعدي بسرعه, وتلاقي فاضل نص ساعه بس مثلا.
  _ 
• لو فيه أسئله True/False أو MCQ وهتجاوبها في ورقة الأسئله, إنقلها على طول في ورقة الإجابه ومتسبهاش للآخر. – في امتحان ال OOP كان فيه 10 T/F و 10 MCQ وحليتهم كلهم وفي الآخر خالص الوقت خلص والمراقب مسبنيش أنقلهم, والحمد لله ضاع 20 درجه !!
  _
• الواحد بالفطره بيبقى في قمة تركيزه في بداية الإمتحان, فا لو جالك سؤال صعب أوي في الإمتحان ومش عارف تحلو متعدش تضيع كل تركيزك فيه وخش على اللي بعده وابقى إرجعله.
  _
• ممكن تقرا الورقه كلها بسرعه عشان لو فيه حاجه مش واضحه تسأل الدكتور لما يعدي على اللجنه بتاعتك.
  _
• إقرا السؤال بتركيز جدا واديلو دقيقه زياده في القراءه والفهم هيوفر عليك كتير وانت بتحله
• ____Cubic B-Spline VS Quadratic B-Spline
• ____Language VS Grammar
  _
• جيب معاك شوكولاته أو عصير أو أي حاجة تديك طاقة و تساعدك على التركيز لحد آخر الامتحان.
  _
• الغش !!! مش عارف أقول إيه لواحد غشاش !!! بص على نفسك كويس وانت بتغش واسأل نفسك هو اللي أنا بغش منه عنده إيه أكتر مني !!! ليه أحط نفسي في موقف الذل ده !!!
  _ 
• محدش يراجع بعد الإمتحان. عشان عمر ما المراجعه فرحت حد وعمرها ما صلحت الغلط. لو انت حالل وحش هتزعل وهيأثر على باقي الإمتحانات من غير أي فايده. خلي كل واحد فاكر إن هو صح حفاظا على ال mood أثناء الإمتحانات : )
  _ 
• آخر حاجه بردو: كل دي أسباب متقولش “أنا جامد” أو “أنا جامد حلاوة” وتأكد إن ربنا هو اللي هيوفقك إن شاء الله, إدعي ربنا كتير وتوكل على ربنا, وإوعى لو حليت كويس تقول “أصل انا كنت جامد”  ولو حليت وحش متعدش تدور على شماعات تعلق عليها مشكلتك. وده مش معناه إنك متدورش على السبب اللي خلاك متحلش كويس.

وَإِذَا مَسَّ الإِنسَانَ الضُّرُّ دَعَانَا لِجَنبِهِ أَوْ قَاعِدًا أَوْ قَآئِمًا فَلَمَّا كَشَفْنَا عَنْهُ ضُرَّهُ مَرَّ كَأَن لَّمْ يَدْعُنَا إِلَى ضُرٍّ مَّسَّهُ

يونس:12

• أحب أشكر كل من شارك في ال post ده
• ____Hanaa Sami
• ____Hadeel Hisham
• ____Daliash
• ____Hisham AbdulHai
• ____Sezo
• ____ Bassel Safwat
• ____Zikas
• ____Rehab Reda
• ____Nora Yusuf
• ____ Rokaya Mohamed for her great and valuable reply
• ____ Hanan Yosri for her great and valuable reply
• ____ Muhammed Hisham for his great an valuable post

• ال post ده هيتعمله update دايما على حسب ردودكو ومشاركتكو إن شاء الله, في انتظار مشاركتكم الفعالة إن شاء الله
• ____مشاكل قابلتك قبل كده خلال الدراسه وعرفتلها حل
• ____مشاكل قابلت زمايلك.
• ____حاجات إنت شايف إنها نقاط قوه فيك
  _
  _
  _
  _